Яңы Мөсәт мәктәбе

Яңы Мөсәт мәктәбе — Башҡортостан Республикаһының Бөрйән районы Иҫке Собханғол ауыл советы составына ингән Яңы Мөсәт ауылында урынлашҡан. Башҡортостан Республикаһы Бөрйән районы Иҫке Собханғол мәктәбе филиалы

Яңы Мөсәт мәктәбе
Ҡыҫҡаса исеме	Иҫке Собханғол урта дөйөм белем биреү мәктәбенең Яңы Мөсәт филиалы
Адресы	Рәсәй Федерацияһы,Башҡортостан Бөрйән районы, Яңы Мөсәт ауылы

Тарихы

1935 йылда Яңы Мөсәттә элекке мәсет бинаһында 4 йыллыҡ башланғыс мәктәп асыла. 1-се класҡа йәштәренә ҡарамай бөтәһен дә алалар. Бының өсөн мәсет бинаһын файҙаланалар. Ҡыҙҙар һәм малайҙар айырым уҡығандар. Беренсе уҡытыусы булып Иҫке Монасиптан Буранов Һаҙый эшләүе билдәле.

1939 йылда Нәби ауылынан Уразаев Сәйетғәле Әхмәтзата улы күсеп ҡайта һәм уҡытыусылыҡ эшен башлай. Уның атаһы Әхмәтзата Уразаев (Яңы Мөсәт ауылынан) заманына күрә бик уҡымышлы кеше булған, мәктәп асылғансы ауылда мәзин булып торған, балаларға белем биргән.

1956 йылда леспромхоздың участогы асылыу сәбәпле, күсеп килеүсе йәштәр һаны арта, һәм өҫтәлмә рәүештә рус кластары асыла, уларҙы Ишкинин Азат Хәлфетдин улы уҡыта.

1966 йылда мәктәп 8 йыллыҡҡа үҙгәртеп ҡорола. Леспромхоз мәктәп яңы мәктәп бинаһын төҙөтә. Тәүге директоры булып Ишбулатов Мөнир Сибәғәт улы эшләй.

1966 йылда Ғәлиәкбәр мәктәбендә уҡытып йөрөүсе Уразаев Хәмит Сәйетғәле улы күсеп ҡайта һәм үҙ мәктәбендә география фәненән уҡыта башлай. Ауылға клуб, заманса мәктәп һалдырыу өсөн янып йәшәй Хәмит Сәйетғәле улы. Ул үҙ ауылында 18 йыл директор вазифаһын башҡара, ауылдың, райондын абруйлы укытыусыһы булды, һуңынан Мораҙым мәктәбендә лә директор булды.

1994—2001 йылдарҙа яңы мәктәп бинаһы төҙөлә. Мәктәп төҙөүҙә ауыл халҡы ҙур көс һала, 2000—2001 уҡыу йылын уҡыусылар яңы мәктәптә башлайҙар.

Яңы Мөсәт мәктәбе Иҫке Собханғол урта мәктәбенең филиалы итеп үҙгәртелә. Тулыраҡ:

Мәктәпте тамамлаусы билдәле шәхестәре

• Ҡасҡынбаев Мөхәррәм Абдразаҡ улы (5 июнь 1963 йыл) — Башҡортостан Республикаһы мәғариф алдынғыһы, йәмәғәт эшмәкәре
• Шәрипов Рөстәм Динислам улы (29 июль 1982 йыл) — Хәйбулла районы хакимиәте башлығы. Салауат Юлаев ордены кавалеры.
• Йәнғәлина (Ғүмәрова) Шәһәрбоҫтан Әхмәт ҡыҙы (24 март 1924 йыл — ….йыл) — «Почёт Билдәһе» ордены кавалеры (1957), хеҙмәт ветераны (1980)
• Ҡасҡынбаева Гәүһәр Абдраҙаҡ ҡыҙы (29 май 1960 йыл — 2 август 2006 йыл) — педагог, филология фәндәре кандидаты, доцент, Башҡортостан Республикаһының атҡаҙанған уҡытыусыһы
• Вәлиев Рәжәп — БР-ның атҡаҙанған энергетигы
• Абдуллин Наил Сәғит улы — Башҡортостан Республиканың атҡаҙанған транспорт хеҙмәткәре
• Ҡасҡынбаев Мөҙәрис Ә., Һырлыбаева Г.Ә., Кинйәбулатова Р.Һ., Уразаев Х. С., Тулыбаева З. Х.- БР-ның мәғариф алдынғыһы

Сығанаҡтар

• Новомусятовская основная школа // Бурзянская энциклопедия / гл. ред. Г. М. Манапов. — Уфа: НИК Башкирская энциклопедия, 2022. — С. 377. — 640 с. — ISBN 978-5-88185-512-2.