Математикала һәм компьютер фәндәрендә алгоритм (фарсы телендә خوارزمی [al-Khwārazmī]) – этаплап иҫәпләү процедураһы. Анығыраҡ әйткәндә, алгоритм – мәсьәләне сисеүҙең аныҡ күрһәтмәләрҙән торған сикле теҙмә рәүешендә сағылдырылған ысулы. Алгоритм ярҙамында иҫәпләү процедураһы башланғыс күрһәтмәнән кереү мәғлүмәттәре менән башланып, башҡарылыу барышында эҙмә-эҙлекле аныҡ күрһәтмәләр аша үтә һәм, аҙаҡта сығыу мәғлүмәттәре булдырып, һуңғы күрһәтмәлә тамамлана.

Ике һандың иң ҙур уртаҡ бүлеүсеһен табыу өсөн ҡулланылған Евклид алгоритмының блок-схемаһы

Алгоритм төшөнсәһе математиканың төп, башланғыс төшөнсәләре иҫәбенә керә. Алгоритмик иҫәпләү процестары бик борондан билдәле. Шулай ҙа был төшөнсә XX быуат башында ғына асыҡтан-асыҡ формалаша.