Болгария общиналары

Община (болг. ОбщинаОбщина [општина]) — Болгарияның икенсе кимәлдәге административ-территориаль берәмеге. Урындағы үҙидаралыҡҡа эйә.

Общинала башҡарма власть органы — кмет (мэр), ул община граждандары тарафынан тура, тиң һәм йәшерен тауыш биреү юлы менән 4 йылға бер һайлана. Үҙәк власть етәкселәре булған президенттан, премьер-министрҙан айырмалы, кмет өсөн был вазифаға һайланыу мөҙҙәтен сикләү юҡ.

Болгарияла — бөтәһе 264 община.

Болгарияла 2011 йылда үткән урындарға һайлауҙа илдең 7,4 миллион халҡының 6 514 917-һе, һайлау үтәһе көнгә тиклем тейешле общинала кәм тигәндә дүрт ай даими теркәлеүҙә булып, урындарҙағы власты һайлау хоҡуғына эйә була. 264 общинала йәмғеһе 11 382 һайлау участкаһы эшләй.^[1]

Община советтары

Община советтары (болг. Общински съветиОбщински съвети) общинаның урындағы үҙидаралыҡ органы булып тора. Община советтары ағзалары «община вәкилдәре» (болг. общински представителиобщински представители) тип йөрөтөлә.

Урындағы һайлауҙарҙа Болгария граждандары бер юлы кмет һәм община вәкилдәре өсөн ике айырым бюллетень менән тауыш бирә. Ғәҙәттә община вәкилдәре совет составына кмет һайлау йомғаҡтарындағы нисбәт буйынса инә. Община советы кметҡа общинаға идара итеүҙә ярҙамлаша (уларҙың күпселеге ғәҙәттә кмет ингән партияға йә коалицияға ҡарай) һәм уның эш-ғәмәлдәренә контроллек итә.

Община вәкилдәре советтың һәр ултырышынан һуң эш хаҡы ала, ләкин был гонорарҙар бер ваҡытта ла тиерлек уларҙың төп килеме түгел. Ваҡ общиналарҙа ерле интеллигенция вәкилдәре — юристар, табиптар, эшҡыуарҙар — община вәкиле итеп һайлана. Община ҙурыраҡ булған һайын, уның советында эре бизнес вәкилдәре һәм профессиональ сәйәсмәндәр күберәк.

Общиналарҙың күпселеге тағы кметлыҡтарға бүленә (350 граждан иҫәбенән башлап^[2]), ә өс община: Варна, Столична һәм Пловдив — ҡала райондарына бүленә, уларҙың башында кметлыҡта (ҡала районында) йәшәүселәр һайлаған кмет тора. Үҙ кметлығы булмаған вағыраҡ торамаларҙа (150 кешенән кәмерәк), община кметы кмет наместниктарын тәғәйенләй.