Рәсәй матбуғаты көнө

Рәсәй матбуғаты көнө – 13 ғинуарҙа билдәләнә. Бөйөк Петр Указына ярашлы, беренсе Рәсәй баҫма матбуғаты “Ведомости” гәзите сыға башлаған тарихи датаға бәйле, Рәсәй Федерацияһы Юғары советы Президиумы тарафынан 1991 йылдың 28 декабрендә 3043-1 ҡарары менән булдырыла. 1703 йылдың 2 ғинуарында (яңы стиль буйынса 13 ғинуар) Мәскәүҙә рус телендә “Ведомости” гәзитенең беренсе һаны донъя күрә. Баҫма тулыһынса “ Мәскәү дәүләтендә һәм тирә-яҡтағы сит илдәрҙә булған, белергә һәм иҫкә алырға лайыҡлы хәрби һәм башҡа эштәр тураһында хәбәрҙәр” («Ведомости о военных и иных делах, достойных знания и памяти, случившихся в Московском Государстве и во иных окрестных странах») тип атала. Петр Беренсе гәзитте реформалар үткәреү өсөн көрәштә һәм Рәсәй империяһының ҡеүәтен раҫлауҙа мөһим сара итеп ҡарай. 2009 йыл башына Рәсәй Федерацияһында 33 меңдән ашыу баҫма матбуғат сараһы теркәлгән. Көн һайын, уртаса алғанда, 20 миллион дана баҫма матбуғат таратыла. 1997 йылдан алып Рәсәй матбуғаты көнөндә киң мәғлүмәт саралары өлкәһендә Рәсәй Президенты премиялары һәм йәш журналистарҙың проекттарына ярҙам итеү маҡсатында гранттар тапшырыла.

Совет матбуғаты көнө

Матбуғат баҫмаларының һөнәри байрамы беренсе тапҡыр СССР-ҙа булдырыла. РСФСР-ҙың Юғары советы указына ярашлы, 1991 йылдың 13 ғинуары Большевистик “Правда” гәзитенең беренсе һаны сығыу уңайынан булдырылған 5 майҙағы “Совет матбуғаты көнө”нә алмашҡа килә һәм яңы атама менән билдәләнелә башлай. Белоруссияла матбуғат көнөн 5 майҙа[1] билдәләйҙәр. 1994 йылдан һәр йыл 3 майҙа матбуғат Бөтә донъя матбуғат көнө билдәләнелә.